جوزي كان في الحمام

والموبايل رن برقم مش متسجل، أول ما شوفت الرقم حسيت إني أعرفه وطلع فعلاً رقم صاحبتي اللي ساكنة جنبنا. جوزي خرج على الشغل، وأنا الظهر روحت عندها عادي علشان نشرب حاجة سوا، دخلت المطبخ وقالتلي هظبط حاجة حلوة وسابت موبايلها في الشاحن جنبي وأنا عارفة إن الباسورد تاريخ ميلادها.

فتحت الموبايل ودخلت على الواتس لقيت إن جوزي بيكلمها ومتفق معاها على الجواز، بيقولها لما أنا أولد وأروح أقعد عند أمي شوية، يرجع هو يكتب عليها ويجيبني قدام الأمر الواقع. وأنا أصلاً عندي 3 بنات وحامل في بنت، وجوزي من زمان نفسه في ولد.

المهم دخلت من تليفونها وبعتله: “يا حبيبي أنا أقنعت أمي وقالت لو هو جاد يبعت الفلوس بتاعة الشبكة النهارده، ولو مبعتش يبقى ما نضيعش وقت”، وبعتله رقم حساب واحدة صاحبتي، وهو رد قال: “اطمني أنا جاد وبحبك وهبعت الفلوس دلوقتي”. وفعلاً بعت من تلات أرقام، كل رقم 25 ألف.

أول ما اتأكدت من صاحبتي إن الفلوس وصلت لها، مسحت كل الرسايل وقفلت الموبايل، وصاحبتي جت شربنا قهوة واتكلمنا كأن مفيش حاجة. رجعت البيت وكلمت البنت اللي وصلها التحويل وقولتلها تبعتلي الفلوس على حسابي وتخلي الكلام في سرها.

جوزي كريم على الناس وبخيل عليا، رجع من الشغل لقيته بيقلب في تليفونه، قلتله عاوزة الموبايل أدخل أبحث في حاجة على جوجل عشان تليفوني فاصل، قالي دقيقة، أكيد كان بيمسح الرسايل فعلاً. دخلت على الواتس لقيته مسح كل حاجة، بس بالليل وهو نايم وأنا عاملة نفسي نايمة فتحت تليفونه وقدرت أعرف الرمز.

تاني يوم راح الشغل ورجع بدري عن العادة وشكله متضايق، دخل الحمام روحت فتحت الواتس لقيتهم بيتخانقوا، هو بيقولها: “جبتي الشبكة؟” قالتله: “أسرقها يعني ولا إيه؟” قالها: “الفلوس مكفتكيش؟” قالتله: “فلوس إيه؟” قالها: “إنتي مجنونة أنا باعتلك 75 ألف جنيه إمبارح؟” قالتله: “إنت المجنون 75 ألف جنيه إيه؟” قالها: “مش إنتي اللي بعتِ وقلتي أمك قالت لو أنا جاد أبعت الفلوس عشان الشبكة وبعتِ رقم فلانة؟” قالتله: “أنا؟ أنا ما قلتش حاجة ولا أعرف البنت دي أصلاً”. المهم انتهت إنه عملها بلوك  وقالها حقي مش هسيبه وكده كده إنتي متلزمنيش تاني.

دلوقتي بقا أعمل إيه؟ أعرفه وأرجعله فلوسه ولا أعمل نفسي معرفش حاجة زي ما أنا؟ لا حول ولا قوة إلا بالله العلي العظيم، لا إله إلا أنت سبحانك إني كنت من الظالمين.